مرني ليلة الأثنين مضنون عيني
مرني عقب ياس وعقب طول المغيبه
يوم شفته وقفت وقلت له يا ضنيني
ليه طول غيابك والتفارق مصيبه
ليت من شاهدك لو بالسنه مرتيني
مير شوفتك صارت يا حبيبي صعيبه
راح دور السنه ما شفت صافي الجبيني
اتمنى واهوجس واطلب الله يجيبه
وا حلالاه لو تمسك يمينه يميني
كود قلبي عقب ما فات يبرد لهيبه
يوم حال البطى والياس بينه وبيني
ما هقيت إن قلبي يهتني مع حبيبه
ما قدرت اوصلّه ولا حصل له يجيني
إفترق شملي وشمل الغضي بالغصيبه
يا حبيبي ترى حبك بحرزٍ مكيني
والموده خطيره تذبح اللي تصيبه
اثر جرح الهوى بالقلب لازم يبيني
وا عذاب المولع واقرادة نصيبه
ليت صدري وسيع وليت قلبي متيني
ضرني بالموده لكن الله حسيبه