فتنة الحفل زيدي مشيتك بختره
كل خطوة بروق وكل نفحه صهيل
باقي بين عقلي والجنون شعره
اقطعيها ياشينه عاشقٍ .. مو هبيل
من غدى الليل شعرك قلت انا بسهره
ومن غدى الصبح وجهك قلت مالي مقيل
ارجفي كنك الما.. فززته حجره
واثبتي كنك الفضه بعين البخيل
وانحني مثل غصن في طرفه ثمره
واوقفي مثل فزعات بدوي اصيل
في عيونك سواد يستحيل اخره
كامن ٍفي بياض ٍ .. اوله يستحيل
واحد تخزرين وما يجيك خبره
اشهد انه عزيز واشهد انه ذليل
ارقصي بين حد الذنب والمغفره
ارحلي في سكونك واسكني في الرحيل
آه ولا لمحتك مقبله مدبره
شفت مثلي نحيل زم حمل ثقيل
وسط ثوب ٍ خيوطه صمت في ثرثره
به قليل ٍ كثير.. وبه كثير قليل
كل شيء بجسمك يفضحه يستره
فيه فتنه قصير وفيه حشمت طويل