يا ساري الليل والهومة هي الهومة
أنا أحسب إني قضيت وتبت من غيي
حتى رماني رهيف القدّ بسهومه
رمية وأنا وقتها ماني بمتهيي
الزين واجد ولكن شفت منظومه
تضرب جمال الطبيعة ضرب يا خيي
في عيونها الموج والسبّاح والعومة
والموت بحر الهوى لا يفتر أيديي
وإن كان شفت القمر محجوب بغيومه
أكيد هي تفتخر وتقول من زيي
أمسيت أقيس الفضاء وأعدد نجومه
من رجف قلبي سمعت الرجف بالحيي
المعتبر لو نظرها تخلف عزومه
شمس الضحى تبتسم في بارد الفيي
بغيت أوصّـف وضاع الوصف برسومه
من ميسم الشوق تكوي وانجحت كيي
الظبي في طلته والحر في حومه
من فوق آجا وسلمى يابعد حيي
ياشبه صغران ابن عشوان مسيومة
عشرين مليون كاش وعاده معيي