رق الحبيب وواعدني يوم
وكان له مدة غايب عني
حرمت عيني الليل م النوم
لاجل النهار ما ييجي يطمني
صعب عليّا انام
احسن اشوف في المنام
غير اللي يتمناه قلبي
سهرت استناه
واسمع كلامي معاه
واشوف خياله قاعد جنبي
من كتر شوقي سبقت عمري
وشفت بكرة والوقت بدري
وايه يفيد الزمن
مع اللي عاش في الخيال
واللي في قلبه سكن
انعم عليه بالوصال
طلع عليّا النهار
سهران في نورالامل
وغنت الاطيار
لحن الهوى والغزل
وفضلت أفكر في معادي
واحسب لقربه الف حساب
وكان كلامي مع صحابي
عن المحبة والاحباب
من فرحتي بدي اتكلم
واقول حبيبي مواعدني
لكن أخاف لا يكون بينهم
مظلوم في حبه ويحسدني
هجرت كل خليل ليّا
وفضلت عايش مع روحي
أحسن يبان شيء في عينيّا
من كتر خوفي على روحي
ولما قرب معاد حبيبي
ورحت أقابله
هنيت فؤادي على نصيبي
من قرب وصله
ولقيتني طايل من الدنيا كل اللي اهواه
بس الي كان فاضل ليّا أسعد بلقاه
لما خطر ده على فكري حير امري
والقرب سبب تعذيبي
ولقيتني خايف على عمري لا يروح مني
من غير ما شوف حسن حبيبي