انا ابويا واحشني جدا .. محتاجه رأيه في حاجات
اهمل في سؤاله عني .. ومجاش من يوم ما مات
نضارته وساعته لسه .. ع الرف مكان ما سابهم
وهدومه جوه كيسهم .. وجداد من يوم ما جابهم
نفسي اتكلم معاه .. احكيله ع اللي تم
وهقوله مين في مرضه .. زاره ونقله دم
وهاقوله اني اسف .. علشان خبيت عليه
واحلفله باني نفسي .. لو يوم المس ايديه
واعمله شاي خفيف .. واقسم وياه رغيف
كان حضنه جمعنا لما .. كان صوته فيه ونس
وكتير بقعد معاه .. واشكيله من الحياه
انا عاف انه سامع .. متأكد انه حس
...
ماهو برضه الموت لا يمكن .. يقتل ف الناس شعورها
وما فيش في الدنيا شجره .. تقطعها من جذورها
وما فيش في الدنيا راحل .. الا وسايب وراه
واحد من صلبه شبهه .. يدعيله في الصلاه
انا ابويا واحشني جداً .. وحشاني معاه حاجات
بطلت اعملها وحدي .. من ساعة لما مات