خلت براق

خلت براق ٍ على العارض زما = من روابي نجد جاذبني غرام
مزنة ٍ في صادق الشعر ادهما = اشتعل يابرق وامطر يا غمام

اعسف القاف العنيد المحكما = سايقه سوق المطيه بالخطام
يا ولد طق الحديد الى احتما = قبل تصبح نارها برد وسلام

ما تضيق وخالقي رب السما = ولا نصدّرهن من المارد حيام
ما قصدت ازعجك يا عذب اللما = يا معرّب من خوال ومن عمام

سايق ٍ روحي على شوفك ظما = من هجير الشوق طاويها هيام
غايتي لا ماك يا ظبي الحما = يا رفيع الساس يا بدر التمام

الاصيل ان قال للعهد احتما = وان تقدّم ما يجي فيه انهزام
كل وصف ٍ فيك عن غيرك سما = مجلسك بالمجد من فوق السنام

لك مرام النفس لو قلبي كما = وكل حر ٍ لا جزع بالجو حام
الله اللي بالخوافي يعلما = عشقتي بنت الحشيمين الكرام

التبليغ عن خطأ