على طاري الفراق اللي طرالي بسيرتك الحين
وعلى طاري الجروح اللي طرت لي وجيت في بالي
دخيل الله هالطاري طلع لي فيك بس منين
دخيل الله مو وقته وانا تعبان في حالي
انا من وين ابدي لك معاك وابتدي من وين
تبي ابدي من اول جرح او العاشر او التالي
بصراحه ما توقعتك تحطم قلبي المسكي
ولا حتى توقعتك تدفعني الثمن غالي
...
معك قلبي قضى عمره على النيه عمر وسنين
وأنا ما غير اتأمل على الله ترأف بحالي
معك أوضح من الواضح ولا ألعب على الحبلين
وأنا هذا الأمر قبل أرفضهما مر في بالي
قبل ما كنت تلقاني اذا ناديت امد ايدين
لأنك تدري الطيبة بقلبي اردى افعالي
تخيل كنت أتأمل تجي وتسأل علي بعدين
لأني قلت بغيابك فال الله ولا فالي
...
غلاتي عندك انك ما تخبي بخاطرك أمرين
طلبتك واللي يرحم والدينك قول يالغالي
الأول تكفى علمني و شاللي بخاطرك واثنين
من اللي أشغلك عني وأشغل قلبك و بالي
وأحس بصدمتي سكين ياعمي أي سكين
احس بضيقه الدنيا تضيق بضيقة احوالي
بعد ما شفت صدماتي على الدنيا من الغالين
بديت الحين اتوقع تجي الصدمة من اظلالي