الليالي برد وأشواقي هبوب
والشتا يذبح وأشوفك بأوله
يا غناة الروح ما غيرك ينوب
والتعب راحه معك وأستسهله
وإنت في صدري مقدر ومحسوب
وبعيوني لك مقام ومنزله
جيت لك ولهان وعيونك دروب
ما حسبت حساب دربك ما أطوله
وعن جمالك ما قدرت أبعد وأتوب
كيف أتوب وربي اللي كمله
كأن في عينك نزاعات وحروب
ترمي القلب بسهمها وتقتله
يا حبيبي والهوى نبض القلوب
وكل نبضة لك بالغلا مسترسلة
كأنه الهتان في عرض النصوب
يحي أوراق الغصون الممحلة
لأن شوفك ذنب من ضمن الذنوب
ومن شرع في الذنب يجزى بأعمله
غير أنا جيتك وفي صدري شبوب
وإنت بإيدينك تحل المسألة
ضمني بالهون يا عذب السلوب
قبل تخاذني الثواني المقبلة
والله إن الوقت في عيوني كذوب
يسرق العشاق ويزيد أعجله
ودي أعلمك يا أغلى محبوب
عن مثل تضرب عليه الأمثلة
من جهل قدرك عرف معنى الرسوب
ومن عرف قدرك ضمن مستقبله
يا حبيبي والهوى نبض القلوب
وكل نبضة لك بالغلا مسترسلة
كأنه الهتان في عرض النصوب
يحي أوراق الغصون الممحلة