سلك الحرير

علّموا اللي برى حالي وبالي وكلي

لا يزيد المواجع بي ونبقى ولايف

من تثنّاه تل العقل والقلب تلّي

تل سلك الحرير ابو ثمانٍ رهايف

بالسراجيف له عرشن وثير امتعلّي

فوق جال الضلوع العوج قلبن مهايف

ناعسات العيون اللي هدبها مضلّي

لوّعت قلبي المبلي عذاب وحسايف

بو جديلن تنثر فوق متنه امتدلّي

كنها في ذهبها طايحات السفايف

خبّروه ان وقت اللعب والمزح زلّي

وما بقى غير جرحي والعنا والكلايف

جايع الخصر عوده بارزاته تشلّي

ما الومه مدبّل ساترات اللفايف

ريقه اللي يقول ان كان ودك تحلّي

ومن شهدها تغار موردات الشفايف

اه يا منك يا هالزمان المولي

كل ما زانت الدنيا سنينه عجايف

جعل من لامني يبلى واشوفه محلّي

واتشمّت به العربان سبع الطوايف

اه يالحظ الاقشر ما جمعني بخلّي

لا تذكرت يوم انه طرى لي النكايف

الهقاوي كثيره وشوفتك ما تملي

مير يا رب سترك يوم تملى الصحايف