زارني عقب العشاء طيفٍ يقول
انتبه يا شوق مثلك ما ينام
لو دريت بما حصل شي يهول
كان حاربت الكرى تسعين عام
جعل تدهاك الدواهي وش تقول
وش لفانا اليوم من زود الكلام
قال أنا مريت يوم السبت ضول
عـند بابه للرعـابيب ازدحـام
واسمع امه عند تفصيخ الحجول
والطوايق شققوا منها حرام
وشوف عيني يوم قفوا به جحول
عـزوةٍ ما بين خـاله والعـمام
وحفروا له حفرةٍ بالخــد طــول
طولها والعرض شبرين تمام
شوف عيني والضبا عنده تجول
باغـيات المـوادع والســلام
والطـيـور الطـايرة فوقه تجــول
فوق قـبـره كاتفـاتٍ كالغمام