لوعة المغرم

أعـالج لـوعة المغــرم وتكبـر لـهفــة المـشــتاق= بحسن رضاي أسوق خطاي أقدّم رجلي وأفهقها

أهوجس من طلوع الشمس الى مغيبات الأشفاق= ولا أدري في ظـلام الليل رجلي وش يوافقــها

أباصبـر وأتـصبّـر ما نظن الصبر ما ينـطاق= لقـيت الصبـر مـرّ ولـو ينوش الكبد يحـرقــها

ألا يا كامليـن المــعـرفة ســلك الغــرام دقــاق= إلا صــاب القـلــوب اللـه يـعـافـينا يـخرّقــها

أنا لي صاحبٍ خـدّه ورى الشيلـه كما البــرّاق= بعرض المزنة اللي مثـل شمس الظهر بارقــها

خـلـقـها اللـه وزيّن خـلـقـها وأخـلاقها الخــلاّق= قـليـلٍ جنـسها فـي جيـلـها سبـحان خـالقــها

لـهـا عيـنٍ إليا لـدّت بها تـذبـح بـها العـــشّاق= بها وصـفٍ من عنـق المــها هـو طول عـاتـقــها

إلا ما شفتـها ضاقت بي الدنيا وصـدري ضـاق= وأنا لو الهـوى لي كـان عينـي ما تـفـارقــها

أحب مشاهد الغـالي عـسى ما هو بحب افراق= ولو راحت معه فـي مـغرب الدنيا ومشرقــها

إلا جا الليل ما شفـتـه تـزيد بصـدري الدقاق= معه روحي بسـلك العنكبوت الله معلقــها

إلا عرّض علي ياقـف مثـل وقفـة كـسيـر السـاق= وسـاعـات الـوداع أسـرع من الكدلك دقايقــها

أن وياه جـدّدنا الـقـســم والعـهــد والمـيــثاق= ولكــن قـــدرة اللـه سابـقــه محـدٍ يـسابـقــها

تعاطـينا العـهـد فـي واحدٍ من عاهده ما باق= مادام إن الثـقــة بالنفــس يلـزمنا نـوثّــقــها

أنا أعرفنا سمه تنـقاد بالدنيا ولا تـنـــساق= ولو تعـطـيك عـهــد اللـه وأمانة لا تـصـدقــها

تشوف أزوالهم مثل العـرب مارالله الــرزّاق= متى ما هب نسـناس الهوى يظـهر حقايقــها