لي صاحب خذني بزينه
عن كل مزيون ورعبوب
روحي غدت نظره رهينه
والقلب من نظراته يذوب
غض يعيش اول سنينه
ومن الدلع له طبع واسلوب
خطر علي ان شفته عينه
من نور حسنه لامزع ثوبه
الشمس في طلعه جبينه
والليل وسط العين مسكوب
والخد ينفح يا سمينه
مثل الشفق في حزه غروب
عود شرات الموز لينه
بارع ورويان ومسلوب
تكسيه الاوصاف الحسينه
ومن المعاني لابس ثوب
قلبي معاه ربي يعينه
عليه صابر صبر ايوب
مجبور يتحمل ضنينه
لو هو غدا بالحب مشغوب